Cassinetta di Lugagnano  
 
Parrocchia
Don Peppino Cereda - Poesie
 
Declamazione dell’ “URSULIN”

A l’è roba de da föra de màtt.
In cà tutt’i mument: Ghè ‘l sciur Curàtt?
Lu ‘l cura de chi, al tapàscia de là
Lassègh la mia gent al temp de fiàdà.

Ecu ch’el riva: Ghe prunt la minestra?
E propi in quèla tacàa la finestra
Compàr al Pepin: Ch’el sent sciur Curatt! …
E mi disi tra mi: Va un po’ per ratt!

E ciciàra ti che ciciàri anca mi
Alfin lu le manda a fàss benedì
Setàndes giò el se mett al mantin
Ed ecu a la porta: Drin, drin, drin

“Sciur Curatt, ghè ‘l curèr de Bufalòra!”
E subit dopu: La ciama la suora!
E la minestra la fila la fila
E la sa slùnga comè nà candila

Oh finalment al sa sèta ancamò
E svelt di cugià ‘l va drè cacià giò
Parmess! Ursula a ghè ‘l sciur Curatt?
Par piasè ma benadissa i bugàtt!

Lù ‘l pianta là baraca e magatèi
E mi ma senti drissàss i cavei
E quand finalment l’è ‘ndàa la Rusèta
Ghè porti in tavola la cutaleta.

L’à nonammò de fa temp a nusmàla
Ed ecu ca vegn gran gent che bragàla
“Ghè in in casa el Curatt – el fa ‘l sor Vincenz
Num sem vegnù chi tö su el cunsens!”

E lu; “Porcu sciampin, ho ditt ai sett ûr!
“Ben scià vegni chi, fè prest per l’amur!”
L’è propi roba de disbattezzàss
E sa sa pu de che part a vultàss

Auff! Finalment la và la la spuseta
E lù ‘l torna ammò a brancà la furcheta
Ma ecu che vegn un nost cereghin
“Sciur Curatt, el dis, ghè in gèsa al fiulin!”

Bögna per forza desmett de mangià
E cvûr cunt la stola a batezà
La pèna turnàa davanti al so piatt
Sa sent vegnì innanz un strusasciavàtt

El Pin sagrista sa ved comparì
“Sciur Curatt: nà dòna de benedì”
E giò la padela e su la padela
E viver e morir semper in quela.

Ma andè un po’ tucc al bel Paradis
Ma senti perfina spuntà i barbis
Eh sì! l’è no finì la litania
“O sciur Curatt ch’el cûr in maglieria,

La dis trafelada la Mariulin
“Ghè una machina cunt ròtt al vidin!”
E via chel va el por sciur Curatt
Sbuffànd tra de lu: “Sii propi tupiàtt”

Quel de la bira